BUTUAN CITY- Mingpatay og 19 ka-tao ang gilusad nga air strikes sa Israel sa Lebanon.
Base sa Health Ministry sa Lebanon, anaa sa 10 ang napatay, lakip ang tulo ka bata ug tulo ka babae, ang namatay sa pag-atake nga ming-igo sa usa ka panimalay sa Deir Qanoun town.
Ang bag-ong pagkamatay natala wala pay usa ka simana human gi-anunsyo sa Amerika nga nagkasabot ang Lebanon ug Israel nga palapdan pa ang ceasefire sulod sa 45 ka adlaw samtang ipadayon sa duha ka kampo ang panaghisgot sugod sa Hunyo.
Taliwa sa ceasefire extension, pareho gihapon nga nagpadayon og binaylo-ay og pag-atake ang Israel ug Hezbollah partikular na sa may southern Lebanon.
Sa usa ka statement, sigon sa health ministry sa Lebanon nga gawas sa namatay sa Deir Qanoun, adunay tulo usab ka tao ang na-angol lakip ang usa ka batang-babae.
Aduna usab 8 ka tao ang namatay ug 29 ang angol sa air strikes sa Israel sa Nabatieh ug Tyre districts.
Sa kataposang taho sa health ministry niadtong Lunes, minghapak na sa 3,000 ka-tao ang napatay sa Lebanon tungod sa strikes sa Israel tali nila sa Hezbollah sukad niadtong Marso.
