BUTUAN CITY – Lima lang gikan sa 22 ka mga rice retailers sa Agusan del Norte nga gi-monitor kung misunod ba sa price cap, ang mi-qualify nga mudawat sa 15-mil pisos nga rice subsidy program sa gobyerno.
Apan sa lima, usa ang padayon pang giproseso rason nga sa pagkutlo niini nga balita, upat pa lang ang nahatagan sa maong ayuda tungod kay ang usa, pag-umangkon man sa mismong rice retailer rason nga gipangayuan pa kini og authorization.
Sa eksklusibong pakighinabi sa Bombo Radyo Butuan, gipadayag ni Lorie Jane Sacote, ang provincial director sa Department of Trade and Industry kon DTI-Agusan del Norte nga kini base na usab sa ilang gihimong monitoring gikan niadtong Septembre 5 hangtud 8 sa entiro lalawigan apil na sa dakbayan sa Butuan dihang gipatuman ang Executive Order No. 39 ni Pangulong Ferdinand ‘Bongbong’ Marcos Jr.
Giklaro usab sa opisyal nga niadtong mga adlawa, wala pa nila gipahibalo nga duna’y ayudang ihatag ang gobyerno pinaagi sa Department of Social Welfare and Development kon DSWD tungod kay napinalisar kini pagka-Septembre 8 na adlaw’ng Biernes.
Gikumpirma sa opisyal nga sa ilang monitoring ning mi-aging semana, wala’y mga rice retailers sa mga lungsod ning lalawigan ang misunod niini gawas lang sa pito ka mga taga-Butuan City apan ang duha, wala’y mayor’s permit rason nga lima lang gayod ang mi-qualify.
Karong semanaha hangtud sa sunod samtang epektibo pa ang price cap, padayon gihapon ang ilang monitoring aron i-endorso ngadto sa Department of Social Welfare and Development ang makita nilang misunod niini.
