BUTUAN CITY – Gikumpirma ni Bombo international correspondent to Taiwan Florence Sibal nga sukwahi sa Pilipinas, dili sa-ulugon sa mga Taiwanese ang adlaw sa mga kalag sa Nobyembre uno ug dos kondili sa Agusto nga gitawag nilang Ghost month kon buwan sa mga kalag.
Usa matud pa kini sa mga tradisyon nga padayon nga gisa-ulog sa Taiwan kada-bulan sa Agosto subay sa ika-pitong bulan sa lunar calendar.
Sumala ni Sibal, kabahin kini sa kultura ug pagtuo sa daghang Taiwanese diin gituohan nga panahon kini nga ang mga espiritu sa mga namatay nga makagawas gikan sa kalibotan sa mga kalag ug makabalik sa kalibotan sa mga buhi.
Niining panahona, mag-andam ang mga pamilya, negosyo ug komunidad og pagkaon, prutas, insenso ug papel nga kuwarta isip halad alang sa mga kalag, ilabina sa mga espiritung walay pamilya nga naghinumdom kanila.
Usa sa mga nag-unang kalihokan niini mao ang Zhongyuan Festival o Hungry Ghost Festival nga ginasaulog sa ika-15 nga adlaw sa lunar month, diin gihimo ang mga ritwal ug pagpanghatag og halad.
Gituohan nga pinaagi niini, mapakita ang pagtahod sa mga kalag ug pangayoon ang kalinaw, proteksiyon ug maayong swerte alang sa ilang mga pamilya ug panginabuhi.
