BUTUAN CITY – Gibarugan ni Alliance of Concerned Teachers kon ACT partylist Rep. France Castro nga subli na usab nga gi-profile sa Department of Education kon DepEd-Central Office ang mga magtutudlong membro sa ilang grupo.
Kini human nagpadala og request ngadto sa mga division ug regional offices sa ahensya si DepEd Undersecretary for Operations Revsee Escobedo aron magsubmite og listahan sa mga ACT Union-affiliated teachers nga mi-avail sa Automatic Payroll Deduction System kon APDS.
Sa eksklusibong pakighinabi sa Bombo Radyo Butuan, gibutyag ni Rep. Castro nga binuang ug wala’y klaro ang nasangpit nga hangyo ilabina nga dugay nang decentralized ang maong Automatic Payroll Deduction System.
Ang gikatingala sa kongresista tungod kay wala’y laing organisasyon sa mga magtutudlo nga gustong kuhaan og listahan ni Escobedo kondili ang mga magtutudlong membro lang sa ACT partlylist.
Gikwestyon sa kongresista nga ang hinungdan nga gi-decentralize ang ilang payroll system tungod sa nasubrahan o kaha naulangan nga mga deductions, langay nga pagsweldo ug uban pang mga problema. Nagtuo ang kongresista nga parte na usab kini sa ideya sa National Task Force-to End Local Communist and Armed Conflict kon NTF-ELCAC kansa notoryus matud pa sa profiling ug red-tagging sa mga progresibong grupo ilabina nga vice chairman niini si DepEd Sec. Sara Duterte-Carpio.
Gikwestyon sa kongresista kung asa mupadulong ang kwartang i-deduct gikan sa ilang payroll sama sa membrship fee niya sa ACT partylist group, mga utang sa Social Security System kon SSS, PAG-IBIG Fund, sa mga bangko ug uban pa.
Kung mulampos matud pa ang hangyo ni Escobedo, kalapasan kini sa Data Privacy Act.
