BUTUAN CITY- Misaka na sa 2.814 trilyones piso ang kinatibuk-ang gross revenue collections sa Bureau of Internal Revenue (BIR) gikan Enero hangtod Oktubre 2026, kansa mas taas og 149.86 bilyones piso o 5.63 porsiyento kumpara sa samang panahon niadtong miaging tuig.
Base sa pinakabag-ong report sa ahensya kagahapon Nobyembre 12, nakolekta usab niini ang 348.54 bilyong piso sa bulan lamang sa Oktubre, nga misaka og 19.48 bilyones piso o 5.92 porsiyento kumpara sa Oktubre 2025.
Sumala ni BIR Commissioner Charlito Martin Mendoza, tumong sa ahensya nga malabwan ang 3-trilyones pisos nga marka sa dili pa matapos ang Nobyembre samtang magpadayon ang labaw sa lima ka porsiyentong pag-uswag sa koleksiyon.
Aron makab-ot kini, gipakusgan sa BIR ang pagpangolekta sa buhis pinaagi sa DARES reform agenda, lakip ang hugot nga pagbantay sa mga obligasyon sa buhis, pagsumpo sa tax evasion ug ilegal nga patigayon, ug pagpaayo sa serbisyo ngadto sa mga magbubuhis aron madasig ang boluntaryong pagbayad sa hustong buhis.
