BUTUAN CITY – Naggahin ang Department of Budget and Management (DBM) og kinatibuk-ang P82.9 bilyong pondo alang sa year-end bonus ug cash gift sa mga kwalipikadong empleyado sa gobyerno alang ning tuiga.
Ang matag-kwalipikadong empleyado makadawat og bonus nga bugti sa usa ka buwang basic salary, dugangan pa og P5,000 nga cash gift.
Sa maong kantidad, P73.449 bilyon ang gigahin alang sa year-end bonus samtang P9.549 bilyon ang alang sa cash gift.
Sumala sa DBM, napagawas na sa ilang departamento ang pondo ngadto sa nagkada-iyang ahensiya sa gobyerno aron masiguro nga madawat kini kauban sa ilang unang sweldo karong Nobyembre.
Kwalipikado sa maong benepisyo ang mga empleyado sa national ug local government nga nakaserbisyo og labing menos upat ka bulan o 120 ka adlaw gikan Enero 1 hangtod Oktubre 31.
Gi-awhag usab sa DBM ang mga ahensiya nga masiguro ang tukmang panahon sa pag-apod-apod sa maong benepisyo.
