BUTUAN CITY – Pila ka adlaw lang human gideklara ang dengue outbreak sa lalawigan sa Agusan del Sur, mi-abot na sa 14 ka mga AgSurnons ang natalang patay tungod sa maong sakit, as of kagahapong adlawa, Huwebes, Oktubre 1.
Base sa pinaka-ulahing dengue situationer sa maong lalawigan, mi-abot na sa 2,018 ang mga kaso sa dengue nga opisyal nilang natala kondiin 14 niini ang namatay kansa punto 69-porsiento sa kinatibuk-ang mga kaso.
Ang lima ka mga local government units nga duna’y pinakataas nga attack rate sa matag-10-mil ka populasyon mao ang mga lungsod sa Rosario, San Francisco, dayon ang Bayugan City, ingon man ang mga lungsod sa Loreto ug Bunawan.
Samtang ang mga natalang LGU nga duna’y patay tungod sa dengue mao ang Bayugan City nga duna na’y lima; Rosario – upat; duha sa Loreto ug tag-usa sa mga lungsod sa Bunawan, San Francisco ug Trento.
Pinaka-apektdong age group anaa sa edad nga 10 hangtud 14-anyos nga mi-abot sa 17.69-porsiento dayon ang 16-anyos nga mao ang mean age kon average nga edad sa usa ka grupo.
Mi-abot na usab sa 1,531 ang na-admit sa mga ospital samtang sa death profile, anaa gikan sa 4 hangtud 52-anyos ang age range sa dengue mortality kondiin gikan sa 14 nga nakalas, walo niini ang mga lalaki samtang unom ang mga babaye.
Sigon ni Dr. Jacqueline Frances Momville, ang Provincial Health Officer II sa maong lalawigan, nang-apod-apod na sila og mga dengue rapid testing kits ngadto sa mga rural health units ug mga ospital alang sa paspas nga diagnosis.
Kini gawas pa sa laing mga lakang nga ilang gihimo aron mabatukan ang padayong paspas nga pagsaka sa mga kaso.
Gidugang pa ni Dr Momville nga kuti ang ilang gihimong mga lakang adiser ang deklarasyon sa dengue outbreak ilabina sa pagtigom sa mga ebidensya sa mga kaso ingon man ebidensya sa mga hotspot areas.
Sa pagkakaron, mihimo na sila og sunod-sunod nga mga lakang alang sa vector control aron mapugngan ang pagdaghan sa mga lamok ug mapahibalo ang tanan sa mga angayang buhaton aron dili mabiktima sa dengue.
