BUTUAN CITY -Namatay na sa edad nga 95-anyos ang kanhi prime minister ug dugay nang nagserbisyo isip finance Mminister sa Pilipinas nga si Cesar E.A. Virata.
Ang iyang pagkamatay gikumpirma sa Rizal Commercial Banking Corporation kon RCBC, diin dugay usab siyang nagsilbi isip corporate vice chairman ug direktor.
Si Virata gi-ila isip usa sa mga prominenteng economic technocrats sa nasud ug nahimong Finance Minister gikan 1970 hangtod 1986, ang pinakataas nga panahon nga naserbisyuhan sa maong posisyon sa kasaysayan sa Pilipinas.
Gitudlo usab siya nga magdumala sa Board of Investments ug sa Monetary Board, ug nahimong representante sa Pilipinas sa World Bank ug Asian Development Bank.
Niadtong 1981 hangtod 1986, nagsilbi siya isip Prime Minister ubos sa administrasyon ni kanhi Presidente Ferdinand Marcos Sr.
Sa iyang taas nga pagserbisyo isip finance chief, na-apil si Virata sa mga reporma sa tax system, tax administration ug customs collection, lakip ang mga paningkamot sa pagpalig-on sa kita sa gobyerno.
Sumala sa usa ka pagtuon sa University of the Philippines, dako ang iyang papel sa pag-uswag sa tax system ug sa pagpalig-on sa internal ug customs revenues sa nasud.
Ni-apil usab siya sa mga polisiya alang sa pagpalapad sa industriya ug pamuhunan. Sa iyang panahon sa Board of Investments ug sa economic team sa gobyerno, gipaningkamotan ang pagdani og foreign investments ug teknolohiya, lakip ang mga polisiya nga may kalabotan sa energy exploration ug development.
Apan ang iyang pagserbisyo nahitabo usab sa usa ka komplikado nga panahon sa kasaysayan sa Pilipinas, ilawom sa martial law ug sa mga tuig nga nag-atubang ang nasud og dagkong problema sa utang, inflation, balance of payments ug economic crisis.
Busa, ang iyang rekord isip economic manager kasagarang gihisgutan isip kabahin sa mas lapad ug kontrobersyal nga kasaysayan sa ekonomiya sa Marcos era.
Sa gawas sa nasud, nahatag usab kang Virata ang oportunidad nga manguna sa mga international economic institutions. Gikan 1976 hangtod 1980, nahimo siyang chairman sa Joint Development Committee sa World Bank ug International Monetary Fund, ug usab sa Board of Governors sa Asian Development Bank.
Human sa iyang serbisyo sa gobyerno, mipadayon siya sa private sector ug nahimong dugay nang opisyal sa RCBC. Sukad 1995, miyembro siya sa board sa bangko ug nahimong corporate vice chairman niadtong 2000, samtang senior adviser sukad 2007.
Si Cesar Virata usa usab ka grandnephew ni kanhi Presidente Emilio Aguinaldo. Nakahuman siya og mechanical engineering ug business administration sa University of the Philippines ug nakakuha usab og MBA sa industrial management sa Wharton School sa University of Pennsylvania.
Sa iyang pagbiya, nahibilin ang taas nga kasaysayan sa serbisyo publiko ug pag-apil sa paghulma sa mga polisiya sa ekonomiya sa Pilipinas—gikan sa buhis ug koleksyon sa gobyerno, hangtod sa investments, banking ug international economic relations.
