BUTUAN CITY – Gikondena ni Bise Presidente Sara Duterte ang nahitabong pagpamusil sa Banga National High School sa South Cotabato niadtong Setyembre 18, nga mao na ang ikatulong insidente sa school shooting nga natala sa nasud karong tuiga.
Sa iyang gipagawas nga pamahayag karong adlawa, gibutyag ni Duterte nga ang ingon niini nga matang sa kapintasa nagpakita sa peligro nga mahimong atubangon sa mga estudyante samtang anaa sila sa eskwelahan.
Dugang sa bise presidente, ang mga eskwelahan kinahanglan mahimong luwas ug malinawon nga lugar alang sa mga bata apan ang kamatu-uran, padayon nga nameligro ang mga kabataan tungod sa kakulang matud pa sa aksyon sa gobyerno.
Gikutay usab ni Duterte ang insidente sa mas lapad nga kahimtang sa pagdumala sa nasud tungod kay imbes nga tutukan ang mga importanteng katungdanan sa gobyerno, lakip na ang seguridad ug kaayohan sa mga Pilipino, mas nakatutok matud pa ang administrasyon sa political consolidation.
Dugang pa niini, dili lamang ang mga biktima sa maong insidente ang angay hinumdoman tungod kay daghan pa nga mga batang Pilipino ang mahimo pang mabutang sa peligro.
Sa katapusan, giklaro sa bise presidente nga ang nasud angay lamang makabaton og mas maayong mudumala.
