BUTUAN CITY – Gibarugan sa grupong Kasapi Coalition, usa ka grupo sa mga youth leaders gikan sa San Pedro, Laguna nga dili makatarunganon alang sa mga botante ang pagsibog sa Barangay ug Sangguniang Kabataan kon BSK elections nga una nang gitakdang himuon karong Nobyembre 2.
Sa eksklusibong pakighinabi sa Bombo Radyo Butuan, gipadayag ni Boyd Luis Antonio Tolentino nga kini na ang ikaduhang higayon nga i-uktaba na usab ang eleksyon human ning mi-aging tuig, kansa dili makatarunganon alang sa mga botante ilabina sa Sangguniang Kabataan tungod kay daghan na matud pa sa mga SK positions ang bakante na ug daghan sa mga SK voters ug officers ang gustong madayon ang eleksyon.
Dili matud pa sila mutuo sa rason nga makadaginot og kwarta ang gobyerno kung isibog ang eleksyon tungod kay nakagasto na ang Commission on Elections kon COMELEC tungod sa gihimo nilang pila ka buwan nang preparasyon alang niini.
Gipadayag niining duna’y motibong pulitikal ang pagsibog sa eleksyon human gipadayag ni Executive Secretary Ralph Recto nga pirmahan gilayon ni Pangulong Ferdinand Marcos Jr ang balaudnong iduso kalabot niini gawas pa sa paspas nga pagpalusot sa maong balaudnon.
Tungod sa ilang pagsupak sa paspas nga pagpalabang sa maong balaudnon, duna na sila’y gi-andam nga petition alang sa pagpangayo og temporary restraining order kon TRO aron hangyuon ang Korte Suprema nga ideklarang unconstitutional ang nasangpit nga balaudnon.
Ila kining iduso sa labing daling panahon human gibutyag ni COMELEC chairman George Erwin Garcia nga hagip-ot na kaayo ang panahon aron pugngan ang pagpatuman niini.
