BUTUAN CITY- Laeng dakong pagsaka na usab sa presyo sa produktong petrolyo ang masinati sunod semana tungod sa nagpadayong krisis sa Middle East, diin posibleng mosaka og P8.50 hangtud P9.50 kada litro ang diesel, P4.50 hangtod P5 ang gasolina, ug P6 hangtod P7 ang kerosene.
Sa miaging duha ka semana, misaka na ngadto sa P10 kada litro ang presyo sa diesel ug gasolina, hinungdan nga nabalaka ang mga motorista ug mga drayber sa epekto niini sa ilang panginabuhian.
Sumala sa Department of Energy o DOE, ang padayong tensyon sa Middle East maoy nagduso sa pagsaka sa presyo sa krudo, samtang sigon ni Energy Secretary Sharon Garin nga wala pa makita ang timailhan nga hapit na matapos ang maong panagbangi.
Base sa balaod, mahimong suspindihon ang excise tax sa petrolyo kung ang average nga presyo sa Dubai crude molapas sa 80 dolyar kada baril, ug sumala sa DOE, milapas na kini sa 100 dolyar kada baril gikan Agosto 13 hangtod Septiyembre 11. Ang desisyon sa pagsuspinde sa excise tax anaa sa Presidente, apan matud sa Palasyo, wala pa’y desisyon kung kanus-a o kung ipatuman ba ang maong suspension.
