BUTUAN CITY- Gisuportahan sa Department of Energy (DOE) ang bag-ong pamaagi sa pagtakda og regional electricity price cap aron mapanalipdan ang mga konsumidor sa Visayas ug Mindanao batok sa posibleng pagsaka pag-ayo sa presyo sa kuryente tungod sa mga problema sa suplay ug dagkong power plant outages.
Uban niini, gipatuman sa Energy Regulatory Commission (ERC) ang Secondary Price Cap (SPC) matag power grid, nga gilauman makapakunhod sa kasagarang presyo sa Wholesale Electricity Spot Market (WESM).
Sumala ni Energy Secretary Sharon Garin, dili angay pas-anon sa mga konsumidor ang sobra kataas nga presyo sa kuryente panahon sa kakulang sa suplay, samtang nagpadayon ang gobyerno sa pagpaandar pag-usab sa mga power plant, pagdugang sa battery reserves, ug pagsulbad sa balik-balik ug dugay nga power outages.
Sumala sa ERC, magsugod ang pagpatuman sa SPC sa Agosto 2026 billing, diin gilauman nga mokunhod ang average WESM price sa Visayas gikan sa ₱18.59 ngadto sa ₱8.47 kada kilowatt-hour, samtang sa Mindanao, mahimo kining mokunhod gikan sa ₱19.56 ngadto sa ₱8.69 kada kilowatt-hour.
Bisan pa niini, sigon sa ERC nga lahi ang aktuwal nga epekto sa matag lugar depende sa WESM exposure sa mga distribution utility ug sa kinatibuk-ang suplay sa kuryente sa matag power grid.
