BUTUAN CITY – Misaka na sa 76 ang namatay sa nasunog nga MV June Aster samtang laing 13 pa ang missing, human nakarekober og dugang mga patay’ng lawas ang mga search teams gikan sa de-pasayruang barko nga nasunog sa kadagatan duol sa Palawan.
Sigon sa Philippine Coast Guard o PCG, 41 pa ka mga sunog nang patay’ng lawas ang narekober gikan sa ferry samtang 43 ang naluwas niadtong gabii nga kini nasunog.
Base sa imbestigasyon ug mga asoy sa mga survivors, nakadungog sila og sunod-sunod nga mga pagbuto sa wala pa paspas nga mikaylap ang kalayo ngadto sa passenger area sa barko.
Sigon ni Commodore Noemi Cayabyab spokesperson sa PCG, posible nga nakatampo ang kusog sa hangin sa paspas nga pagkaylap sa kalayo, base sa mga asoy sa mga survivor.
Aduna usa’y pipila ka mga pasahero nga milukso ngadto sa dagat human nila makita ang kalayo ug posibleng wala na silay panahon nga makakuha o makasul-ob sa ilang mga life jacket.
Ang MV June Aster nagbiyahe gikan sa Manila sakay ang 132 ka mga pasahero ug tripulante dihang kalit nga nasunog ang ubos nga bahin sa barko niadtong Miyerkules sa gabii, mga 2.2 kilometro lamang ang gilay-on gikan sa ilang destinasyon nga Coron, northern Palawan.
