BUTUAN CITY- Nagpasaka ang kampo ni kanhi Speaker Martin Romualdez og mga urgent motion ug manifestation aron temporaryo kining magpabilin kini sa ospital.
Ang maong lakang gisundan sa pagpagawas sa Sandiganbayan og warrant of arrest batok sa magbabalaod may kalabotan sa kasong plunder tungod sa giingong anomalya sa mga flood control project.
Sa 12-ka palid nga dokumentong gisumite sa abogado sa magbabalaod, gipahibalo nila ang anti-graft court nga ang representante sa Leyte naka-confine sa Cardinal Santos Medical Center sa San Juan City tungod sa pipila niining balatian.
Lakip sa iyang mga kondisyon sa panglawas ang hypertension, Type 2 diabetes mellitus, hyperthyroidism, ug coronary artery disease.
Hugot usab nga gibantayan ug kanunay nga gimonitor sa mga doktor ang kahimtang sa panglawas sa magbabalaod.
Sumala sa iyang mga abogado, wala kini magpasabot nga naningkamot ang magbabalaod nga makalikay sa pag-aresto.
Samtang, gikatakdang ipailalom sa Sandiganbayan Third Division ang kahimtang sa panglawas ni Romualdez sa usa ka medical evaluation.
Una niini, gikumpirma ni Interior Secretary Jonvic Remulla ang pagserbisyo sa warrant of arrest batok kang Romualdez samtang kini anaa sa ospital.
Dugang pa sa opisyal, gibutang sa pagbantay sa kapulisan ang maong pasilidad human makompleto ang dokumentasyon ni Romualdez.
