BUTUAN CITY -Naghatag og kabalaka ngadto sa mga residente ang kalit nga pagtumaw sa usa ka grass fire sa Sitio Brazil, Barangay Mat-i, Surigao City, lalawigan sa Surigao del Norte kaganina.
Kini tungod sa paspas nga pagkaylap sa kalayo nga hatud sa grabe ka-init sa panahon ug kusog nga huyop sa hangin.
Gitabangan sa mga residente ang pagpalong sa kalayo tungod sa kabalaka nga mu-abot kini sa poste ug transformer sa kuryente, nga mahimong makahatag og peligro sa mga residente ug kabtangan.
Padayon ang pahimangno ngadto sa publiko nga likayan ang pagsunog sa sagbot ug basura, ilabina sa panahon nga init ug kusog ang hangin, aron mapugngan ang posibleng pagkaylap sa kalayo.
Gidasig ang mga residente nga magmatngon ug ireport dayon sa mga otoridad ang bisan unsang insidente sa sunog aron malikayan ang mas dakong kadaot.
