BUTUAN CITY- Mingsaka na sa labing menos 38 ka tawo ang patay human mingtay-og ang magnitude 7.7 nga linog sa Indonesia kaganiha, sumala sa National Disaster Mitigation Agency o BNPB. Samtang, nagpadayon usab ang search and rescue operations sa mga apektadong lugar.
Ang linog nahitabo alas-5:00 sa kaadlawon ug adunay giladmon nga 15 kilometros, gisundan sa daghang aftershocks lakip ang magnitude 6.1, nga nakapagrabe sa kadaot sa mga building ug imprastraktura. Gi-taho usab ang pagkamatay sa mga residente sa Sikka, Manggarai ug East Manggarai provinces, samtang adunay mga naangol.
Kapin 2,000 ka tawo ang gibakwit o mibalhin sa mas luwas nga lugar human mipagawas og tsunami warning ang mga otoridad, apan gibawi ra usab human minglabay ang tulo ka oras dihang namatikdan nga walay kabag-ohan sa dagat.
Una nang gitaho nga 54 ka balay ang grabeng nadaot, lakip ang healthcare facilities, mga simbahan ug moske, government buildings ug usa ka educational institution.
Gipahimangnoan usab sa BNPB ang mga residente nga magpabiling kalmado ug likayan ang baybayon ug mga estrukturang adunay timailhan sa kadaot, samtang padayon pang gisusi ang tibuok epekto sa linog sa maong hilit ug kabukirang rehiyon.
