BUTUAN CITY – Daling nagpagawas og tsunami warning ang Indonesian Meteorology, Climatology and Geophysics Agency (BMKG), human mita-og ang magnitude 7.7 nga linog sa dagat duol sa Flores Island, sa East Nusa Tenggara, Indonesia, kaganinang alas-5:50 sa sayong buntag.
Sumala sa United States Geological Survey kon USGS, mabaw ra ang giladmon nga mi-abot sa 10 kilometros kondiin nasubay ang epicenter, mga 68-kilometros sa amihanan-kasadpan sa Ende.
Kusog ang pag-uyog ug naghatag og kakulba sa mga residente nga naglumba pagpaggawas gikan sa ilang nahimutangan padulong sa hawan.
Sa usa ka ospital, nanggawas ang mga pasyente human mabati ang kusog nga paglinog, ug adunay mga report nga nangliki ang bungbong sa pipila ka mga dakbalay
Daling gi-abisohan ang mga residente sa mga baybayon nga mopahilayo sa dagat ug mga dapit duol sa suba ug mangadto sa mas taas nga lugar.
Apil sa mga lugar nga gi-alerto ang East Nusa Tenggara, West Nusa Tenggara, South Sulawesi ug Southeast Sulawesi.
