BUTUAN CITY- Gipasiugda ni South Korean President Lee Jae Myung ang pag-abli og direktang pakigsabot sa North Korea aron pormal nga tapuson ang dugay nang Korean War, samtang nagkalalom ang relasyon sa Pyongyang ug Russia ug gipadayon niini ang pag-angkon nga usa na kini ka “irreversible” nuclear state.
Sa iyang pakigpulong atol sa selebrasyon sa anibersaryo sa kagawasan sa Korea gikan sa kolonyal nga paghari sa Japan, gihangyo ni Lee ang duha ka Korea nga undangan ang mga hulga batok sa usag usa ug sugdan ang diskusyon isip mga direktang partido sa gubat, lakip ang mga lakang aron mapugngan ang dugang pagpalambo sa nukleyar nga kapasidad sa North Korea.
Ang duha ka nasod teknikal nga nagpabiling anaa sa gubat sukad natapos ang 1950–1953 Korean War pinaagi lamang sa armistice ug walay pormal nga peace treaty.
Ang panawagan ni Lee miabot samtang gisupak sa North Korea ang umaabot nga joint military exercises sa US ug South Korea ug nagpadayon sa pagpalig-on sa kooperasyon militar niini uban sa Russia, diin gituohang nakadawat ang Pyongyang og pinansyal nga suporta, pagkaon, enerhiya ug teknolohiya militar baylo sa paghatag og mga tropa ug armas alang sa gubat sa Russia batok sa Ukraine.
