BUTUAN CITY – Gipadayag ni United States President Donald Trump nga posible niyang ideklara ang Strait of Hormuz isip teritoryo sa Estados Unidos human mapildi ang Iran.
Gihimo ni Trump ang maong pamahayag atol sa usa ka political rally sa usa ka police academy sa New York state apan sumala sa usa ka White House official, nag-joke lamang si Trump bahin sa maong deklarasyon.
Ang Strait of Hormuz usa sa labing importanteng sea lanes sa kalibotan tungod kay dinhi moagi ang dakong bahin sa global oil shipments. Sa nagpadayon nga gubat tali sa US, Israel ug Iran, nahimo kining sentro sa tensyon tungod sa pag-angkon sa duha ka kampo sa kontrol niini.
Sa pagkakaron, wala pay opisyal nga deklarasyon nga himuong teritoryo sa Estados Unidos ang Strait of Hormuz, ug gisalikway usab sa Iran ang mga pag-angkon sa US bahin sa kontrol sa maong importanteng agianan.
