BUTUAN CITY – Mi-abot na sa 38 ang kumpirmadong namatay sa magnitude 7.7 nga linog nga mitay-og sa Flores Island, Indonesia kaganinang sayo sa buntag, base na sa reports gikan sa mga rescue ug emergency officials, ug posible pa nga mosaka ang ihap samtang nagpadayon ang search-and-rescue operations.
Aduna usa’y mga nasamdan ug duha ka missing tungod sa landslide, samtang daghang building ang nangaguba. Ang tsunami warning nga unang gipagawas gibawi na human nga nakatala lang og gamay nga pagsaka sa mga balod.
Natala ang magnitude 7.7 nga linog sa dagat duol sa Flores Island, sa East Nusa Tenggara, Indonesia, kaganinang alas-5:50 sa sayong buntag.
Daling gi-abisohan ang mga residente sa mga baybayon nga mopahilayo sa dagat ug mga dapit duol sa suba ug mangadto sa mas taas nga lugar.
Apil sa mga lugar nga gi-alerto ang East Nusa Tenggara, West Nusa Tenggara, South Sulawesi ug Southeast Sulawesi.
