BUTUAN CITY- Gitay-og sa usa ka magnitude 6.4 nga linog ang Sarangani, Davao Occidental kaganiha sa may alas-12:13 sa udto, sumala sa Philippine Institute of Volcanology and Seismology kon PHIVOLCS. Una kining gitala nga magnitude 7.0 apan giusab ngadto sa 6.4 human sa recalculation sa ahensya.
Sumala ni PHIVOLCS Director Teresito Bacolcol, ang linog naggikan sa Cotabato Trench ug adunay giladmon nga 13 ka kilometro. Gikonsiderar usab kini nga aftershock sa magnitude 7.8 nga linog nga miigo sa Maasim, Sarangani niadtong Hunyo 8.
Nabati usab ang Intensity V sa Glan, Sarangani, samtang Intensity IV ang naitala sa General Santos City ug ubang bahin sa Sarangani ug South Cotabato.
Mipasidaan usab ang PHIVOLCS ngadto sa publiko nga posible pa ang sunod-sunod nga aftershocks, apan gipasalig nga walay peligro sa makadaot nga tsunami tungod gamay lamang ang naitalang pagtaas sa lebel sa dagat.
