BUTUAN CITY- Nagpasidaan ang mga lider sa nagkadaiyang parte nasud sa posibleng paglala sa humanitarian crisis sa Gaza ug nanawagan sa diha-diha nga pagpadayon sa ikaduhang hugna sa ceasefire, samtang sigon sa Punong Ministro sa Qatar, nga anaa na sa “kritikal nga kahimtang” ang kasamtangang kasabutan sa hunong-buto.
Samtang nagpadayon ang diplomatikong paningkamot, naglunsad usab ang Israel og mga airstrike sa Maghazi refugee camp sa Central Gaza ug nakapatay og pito ka Palestino sa amihanang bahin sa teritoryo, lakip ang usa ka 70-anyos nga babaye ug iyang anak, samtang aduna usab nasamdan nga bata sa Gaza City.
Gisaway usab ni Syrian President Ahmed al-Sharaa ang Israel, kinsa iyang giakusahan sa pagpagrabe sa tensyon sa rehiyon aron malihis ang atensyon gikan sa giingon niining mga “makalilisang nga masaker” sa Gaza.
Sumala sa mga taho, mikabat na sa kapin 70,000 ang namatay ug kapin sa 171,000 ang nasamdan sa Gaza sukad niadtong Oktubre 2023, samtang 1,139 ka tawo ang napatay ug dul-an 200 ang gibihag.
