BUTUAN CITY – Nahimong makasaysayanon ug makahuluganon nga selebrasyon ang nahitabo sa kapistahan sa Barangay Bigaan, Hinatuan sa Surigao Del Sur tungod sa presensya ni Bise Presidente Sara Duterte sa ilang Besperas o Pre-Fiesta nga Programa karung adlawa, Hulyo 8, 2026.
Mitambong ang Bise Presidente Sara Duterte sa pagsaulog sa 18th Araw sa Barangay Bigaan ug 65th Patronal Fiesta sa Mother of Perpetual Help sa Hinatuan, Surigao del Sur, samtang nagpadayon ang ikatulong adlaw sa iyang impeachment trial sa Senado.
Gawas sa pista, misalmot usab ang bise presidente sa usa ka tree planting activity nga gipahigayon sulod sa Bigaan National High School uban sa mga kawani sa Department of Education (DepEd).
Sa iyang pagpamulong gipahayag ni Duterte ang iyang dakong kalipay sa personal nga pagpakigkita sa mga residente sa Hinatuan, ug nagpasalamat sa ilang mainitong pagdawat.
Gidasig usab niya ang publiko nga padayong higugmaon ang Pilipinas alang sa Diyos, sa nasod, ug sa matag pamilyang Pilipino.
Gipahinumdoman usab ni Bise Presidente Sara Duterte ang tanan sa kaimportante sa panaghiusa, edukasyon, pagtinabangay, ug hiniusang paningkamot sa pagtukod og mas lig-on nga mga komunidad.
Ang maong kalihokan gitambongan usab sa mga opisyal sa munisipyo sa Hinatuan nga gipangunahan ni Municipal Mayor Atty. Tito Canedo III ug Vice Mayor Joan M. Garay, uban sa mga miyembro sa Sangguniang Panlalawigan sa Surigao del Sur gikan sa Unang Distrito ug Sangguniang Bayan sa Hinatuan.
Mitambong usab ang mga Punong Barangay gikan sa 24 ka barangay sa Hinatuan, ang pamilya sa DepEd sa Barangay Bigaan, mga estudyante, mga residente, ug mga bisita gikan sa kasikbit nga mga barangay ug Poblacion nga nakig-ambit sa pagsaulog niining halandumon nga higayon.
