BUTUAN CITY – Gikumpirma ni Senator Francis “Chiz” Escudero, nga napili isip presiding officer sa Senado nga mibarug isip impeachment court, nga kinahanglang dili moubos sa 16 ka boto sa mga senador nga magsilbing hukom aron mahukmang guilty si Vice President Sara Duterte sa impeachment trial.
Sa iyang mensahe human gidawat ang posisyon, gibutyag ni Escudero nga klaro sa Konstitusyon nga walay opisyal nga mamahimong mahukman sa usa ka impeachment trial nga walay pag0uyon sa two-thirds sa katibuk-ang miyembro sa Senado.
Gipasabot niya nga ang maong interpretasyon nahiuyon usab sa nahimong desisyon sa Korte Suprema sa kasong Bayan v. Zamora niadtong 2000 diin gihisgutan ang kinahanglang two-thirds vote sa Senado.
Tungod niini, angayan matud pang sundon kini aron dili makaapekto sa katungod sa respondent ug sa katawhan.
Gipamugos pa sa senador nga katungdanan sa matag senador nga magsilbing hukom nga sundon ang nagtunhay nga balaod bisan unsa ang ilang personal nga panglantaw.
Una niini napili si Escudero isip presiding officer sa impeachment court sa botong 12 pabor ug walo ang misupak.
Gipangunahan na usab niya ang impeachment court niadtong 2025 samtang siya ang Senate President.
Gipahinumduman usab niya ang iyang mga kaubanang senador nga ipatunhay ang pagka-patas ug walay gidapigan sa pagdungog sa kaso alayon sa Konstitusyon ug nagtunhay nga mga balaod.
