BUTUAN CITY- Nakakuha og bag-ong mga pasalig sa pamuhunan gikan sa mga kompanya sa Canada si President Ferdinand Marcos Jr. atol sa iyang state visit sa Vancouver, diin iyang gipahibalo nga ang mga kasabotan magbukas og dugang nga mga oportunidad sa trabaho ug makapalig-on sa ekonomiya sa Pilipinas, ilabina sa sektor sa mining, information technology (IT), ug business process management (BPM).
Lakip sa mga dagkong pamuhunan ang plano sa OceanaGold nga mogasto og US$1.9 bilyon aron palapdan ang operasyon niini sa Nueva Vizcaya, samtang ang B2Gold magpuhunan usab og US$14 milyon alang sa pagpalapad sa solar power plant sa Masbate Gold Project.
Samtang anaa sa Canada, gidayeg usab ni Marcos ang kontribusyon sa mga Overseas Filipino sa ekonomiya ug maayong dungog sa nasud, bisan pa nga gisugat ang iyang pagbisita og protesta gikan sa pipila ka mga Pilipino nga nanawagan og accountability batok sa giingong korapsyon sa gobyerno.
Giklaro usab ni Palace Press Officer USec. Claire Castro, nga nagpadayon ang imbestigasyon sa mga giingong anomalya ug walay bisan kinsa nga makalikay sa hustisya.
Sa usa ka punto nangayo og tabang ang Malakanyang sa Vancouver police human matud pa gidumog sa mga raliyista.
