BUTUAN CITY – Na-finalize na sa Commission on Elections kon COMELEC-Agusan del Norte ang listahan sa mga botante human naberipika ang mga voting precincts kondiin ilang gisiguro nga ma-assign gayod sa saktong polling precincts ang mga botante.
Sa eksklusibong pakighinabi sa Bombo Radyo Butuan, gipadayag ni provincial election supervisor Atty April Joy Balano, ania dinhi sa siyudad sa Butuan ang mga personahe sa ilang sentrong buhatan nga maoy nag-verify ug nag-certify nga sakto ang ilang pag-assign sa mga botante ingon man ang pagpinalisar sa listahan sa mga botante.
Sa kinatibuk-ang lalawigan apil na sa dakbayan sa Butuan, mu-abot sa 486,529 ang natala nilang mga regular voters samtang 180,508 ka mga Sangguniang Kabataan kon SK voters.
Gipadayag sa opisyal nga dinhi sa dakbayan sa Butuan, duna’y nadugang nga 22 ka mga bag-ong mugna nga mga voting centers tungod sa paningkamot COMELEC-Butuan nga ma-apod ang nagkadaghang mga botante.
Samtang ang tibuok lalawigan, mi-abot sa 12 ang mga bag-ong mugna nga voting centers rason nga anaa na karon sa 34 ka mga voting centers ang entiro lalawigan kansa dakong tabang unya sa umalabot nga eleksyon tungod kay malikayan naman ang over-crowding.
