BUTUAN CITY – Nag-atubang karon og federal charges sa Estados Unidos ang Filipina nurse practitioner nga si Marizel Yukee nga taga-Las Vegas human nasuta nga siya ang nanguna sa usa ka dako nga healthcare fraud scheme nga nakapangilad og Medicare ug TRICARE og hapit US$1 bilyon (P51.6 bilyon).
Gipagawas sa korte sa Texas ang warrant of arrest batok kaniya human siya gi-akusahan og healthcare fraud, wire fraud, illegal kickbacks, ug money laundering.
Sumala sa mga piskal, ilang target ang mga tigulang ug pasyente nga grabe ang sakit pinaagi sa dili kinahanglan nga wound treatments nga gisumiter sa gobyerno aron makasingil.
Gika-ingong si Yukee konektado sa upat ka wound-care clinics sa Texas, Nevada, California ug Hawaii, diin nagbayad og ilegal nga kickbacks alang sa patient referrals.
Base sa imbestigasyon, gipangpeke matud pa niini ang medical records ug gisubmite ang mga serbisyo nga wala gikinahanglan.
Ang kwarta nga nakuha gigamit sa iyang mga luho ug mahal nga butang sama sa Ferrari nga US$500,000, Bulgari necklace nga US$865,000, balay sa Hawaii nga US$1 milyon, ug beach resort project sa Santa Ana, Cagayan nga US$4.6 milyon.
