BUTUAN CITY – Wala manunga ang ang 18 ka kanhi miyembro sa Philippine Marines sa pagdungog sa Senate Blue Ribbon Committee nga karon gipangunahan ni Senador Erwin Tulfo human sa reorganisasyon sa Senado.
Sumala sa Committee Secretary (ComSec), gi-imbitar ang mga kanhi sundalo apan wala sila mitubag, lakip na ang ilang abogado nga si Atty. Levito Baligod.
Wala usab mutunga si kanhi Congressman Mike Defensor, kinsa wala maapil sa listahan sa giimbitar. Wala usab mutunga ang pipila ka mga kanhi ug kasamtangang magbabalaud sama nila Martin Romualdez, Zia Alonto Adiong, Jose Alvarez, Julienne Baronda, ug Leila de Lima.
Bisan pa sa kakulang sa mga giimbitar, nagpadayon ang sesyon uban ang mga opisyal gikan sa DPWH, DOJ, DBM, Office of the Ombudsman, ug si NBI Director Melvin Matibag isip resource persons.
Madumdumang sa mi-aging pagdungog niadtong Hunyo 4, mitumaw ang alegasyon nga gi-suhulan ni Defensor ang 18 ka mga ex-Marines aron motestigo sa isyu sa flood control anomaly, apan kini iyang gipanghimakak.
Sa sulat ni House Secretary-General Cheloy Velicaria-Garafil, giingon nga tungod sa “parliamentary courtesy” wala mosalmot ang mga kongresista. Kini nga panghitabo nagpakita sa komplikado nga dynamics sa Senate investigations, ug unsaon pagbalanse sa parliamentary courtesy ug sa panginahanglan sa accountability.
