BUTUAN CITY – Gitinguha karon sa Department of Agriculture (DA) nga isaka ngadto sa 93-milyones pesos ang pundo alang sa research and development sa ube, tungod sa nagkataas nga demand niini sa tibuok kalibotan.
Sigon ni DA Assistant Secretary ug spokesperson Arnel de Mesa, ang maong sugyot nga pundo para sa tuig 2027 maglakip usab sa pagpalambo sa pagpadaghan sa mga liso ug pananum sa ube.
Mas dako kini ikumpara sa pundo karong tuiga nga anaa lang sa 17-milyones pesos para sa research and development sa ube, dungan sa pagpaningkamot sa pipila ka unibersidad, lakip ang University of the Philippines (UP) Diliman ug Los Baños, nga mapataas ang lokal nga produksyon sa maong lagotmon.
Gipasabot ni De Mesa nga gusto nilang makuha ang “geographic indication” alang sa ube aron mailhan ug maprotektahan ang gigikanan niini sa nasod, pareho sa mangga sa Guimaras ug buongon sa Davao.
Gibatbat usab ni De Mesa nga ang kalamansi ug uban pang mga tropical fruits nagkasikat sa mga kamerkadohan sa ubang mga nasud.
Dugang pa sa opisyal nga nakig-alayon na sila karon sa Department of Trade and Industry (DTI) sa pag-promote sa mga produkto sa Pilipinas nga gina-export.
