BUTUAN CITY – Padayong nanawagan ang liboan ka mga kabatan-onan ug ang Department of Health (DOH) nga hingpit nang wad-on o i-ban ang paggamit sa mga vape ug e-cigarette sa nasod sukad niadtong gisaulog ang “World No Tobacco Day”.
Gikalipay ni Health Secretary Ted Herbosa ang film festival nga gimugna sa mga batan-on may kalabutan sa problema sa vaping tungod kay gisuportahan sa departamento ang hingpit nga pag-ban sa vape sa Pilipinas.
Gipasabot sa DOH nga ang panglawas dili angay isalikway tungod sa bisan unsang interes samtang padayong gipahugtan ang regulasyon sa vape dungan sa lihok aron mapanalipdan ang mga kabatan-on batok sa nicotine addiction ug uban pang kakuyaw nga dala niini.
Ang maong panawagan nga gipangulohan sa TobaccOFF NOW! Movement naghangyo sa gobyerno nga molihok ug manghilabot sa tobacco ug vape industry sa nasod aron maprotektahan ang ilang henerasyon sa dugay nang pagka-adik sa nikotina.
Samtang wala pa kini ma-ban, gisugyot usab sa grupo nga isaka gikan sa 18-anyos ngadto sa 25-anyos ang age limit sa mga gidid-an nga makapalit; i-ban ang mga flavor sa vape, nga sa pagkakaron miabot na ngadto sa 16,000 ka flavors sa international market sumala sa datos sa World Health Organization (WHO); ug patas-an usab ang buhis sa vape.
