BUTUAN CITY – Usa ka Nepali nga mountain guide ang naluwas sa kamatayon human siya ma-stranded sa Mount Everest sulod sa hapit unom ka adlaw nga walay igo nga oxygen, pagkaon, ug maayong kapuy-an.
Ang lalaki giila nga si Dawa Sherpa, nga gituohang namatay na samtang nanaug gikan sa tumoy sa Everest human dili na siya makontak.
Apan paglabay sa unom ka adlaw, nakita siya nga buhi sa usa ka cleanup team samtang hinay-hinay siyang nanaug paingon sa Everest Base Camp.
Gikuha gelayon siya sa helicopter ug gidala sa ospital sa Kathmandu, diin gitambalan siya tungod sa dehydration, frostbite, ug bali sa bukog.
Sigon pa sa lalaki, nahutdan siya og oxygen samtang anaa sa taas nga bahin sa bukid rasong dili na siya makalihok og tarong.
Iyang gipaambit usab nga wala siyay nakaon sa unang duha ka adlaw, ug ang bugtong paagi aron mabuhi mao ang pag-usap og yelo aron makainom og tubig.
Nakakita usab siya og pipila ka tsokolate sa iyang bulsa nga nakatabang kaniya sa paglahutay sulod sa pipila ka adlaw didto sa bukid.
Sumala pa sa iyang estorya, natanggong siya tungod kay nahulog siya sa usa ka siwang sa yelo sulod sa mga duha ka adlaw ug tunga.
Nagpasalamat siya nga adunay nahitabo nga avalanche nga maoy hinungdan sa pagkapuno sa siwang og yelo, nga nakahatag kaniya og higayon nga makagawas.
Human makagawas, gigamit niya ang mga pisi sa bukid aron makanaog bisan pa man sa nagpadayon nga peligro sa laing avalanche.
