BUTUAN CITY – Gikumpirma sa Department of Health kon DOH nga wala pa’y nakatalang kaso sa Ebola hangtod karon dinhi sa Pilipinas tungod sa hugot nga border screening, health surveillance, ug monitoring protocols nga gipapatuman sa tanang airport ug pantalan.
Sigon sa DOH, hugot nga gipatuman ang mga preventive measures sa pagsulod pa lang sa nasud samtang ang World Health Organization (WHO) nagpadayon sa pagbantay sa sitwasyon sa Ebola sa gawas sa nasud.
Sumala sa datos sa WHO niadtong Hunyo 4, adunay 381 ka kumpirmadong mga kaso nga natala sa Democratic Republic of Congo (DRC) ug 15 sa Uganda. Una nanggideklara sa WHO ang public health emergency of international concern tungod sa pagkaylap sa Ebola sa maong mga nasud niadtong Mayo 17.
Aron mapadayon ang Ebola-free status sa nasud, hugot nga gipatuman sa DOH-Bureau Of Quarantine ang lima ka lakang sa health safety protocol alang sa mga pasahero nga mosulod sa Pilipinas sama sa health declaration form, red QR code, arrival screening, monitoring, ug mandatory quarantine.
Sa dili pa mobalik sa Pilipinas, gikinahanglan nga ang mga pasahero mu-fill up og health declaration form pinaagi sa etravel.gov.ph aron masiguro ang ilang kahimtang sa panglawas samtang ang tanang pasahero nga gikan sa outbreak-affected areas sulod sa miaging 21 ka adlaw, tagaan og red QR code.
