BUTUAN CITY – Nagtoo si Senator Raffy Tulfo nga dunay posibilidad nga duha ka senador gikan sa majority bloc ang mobalhin sa minority tungod sa matud pa dili pag-uyon sa pipila ka panghitabo sa Senado.
Sigon ni Tulfo nga namatikdan niya ang dili pagkakuntento sa pipila ka miyembro sa majority taliwa sa tensyon ug isyu sulod sa taas nga balay-balaronan.
Sumala sa senador, dunay duha ka miyembro sa majority bloc nga daw dili komportable sa mga nahitabo base sa ilang lihok og batasan apan wala niya gitumbok kung si-kinsa ang mga niini.
Sa kasamtangang dunay 11 ka miyembro ang minority bloc samtang 12 usab ang anaa sa majority bloc.
Dili lakip sa ihap sa aktibong majority members si Senator Ronald dela Rosa, nga nagpabiling wala nagpakita sa publiko human migawas ang arrest warrant batuk kanya gikan sa International Criminal Court (ICC).
Tungod niini, gibutyag ni Tulfo nga nipis na lang sa majority ug mamahimong mausab ang balanse sa gahum sa Senado kung dunay mga senador nga mobalhin sa kampo.
