BUTUAN CITY – Mikunhod na sa 10 ang global cases sa Hantavirus human gikumpirma sa United States nga negatibo ang usa ka indibidwal nga kaniadto adunay inconclusive nga test, sumala sa World Health Organization.
Nasayrang tulo na ang namatay tungod sa outbreak sa MV Hondius cruise ship nga mibiya gikan sa Argentina niadtong Abril 1.
Ang kasamtangang outbreak nahitabo tungod sa Andes virus, usa ka talagsaon nga strain sa hantavirus nga mahimong matakod sa tawo pinaagi sa dugay ug suod nga kontak.
Sumala sa WHO, walay kausaban ang virus nga makapasamot sa transmissibility o kabug-at sa sakit niini.
Sa pagkakaron, wala pay aprubadong bakuna o antiviral treatment batok sa Hantavirus ug ang pag-atiman naka-focus lamang sa suporta sa pasyente.
Girekomenda sa WHO ang 42 ka adlaw nga quarantine alang sa high-risk contacts ug self-monitoring alang sa low-risk contacts.
Dili kini makumpara sa COVID-19 ug wala kini giisip nga hulga sa pandemya.
