BUTUAN CITY – Gipanghimakak sa United States Central Command ang report nga adunay barko sa U.S. Navy nga naigo sa Iran, human sa pamahayag sa pipila ka Iranian news agencies nga dunay giingong giatake nga barko duol sa usa ka pantalan sa habagatan-sidlakan sa Strait of Hormuz.
Sumala sa Iran, ang maong barko matud pa nakalapas sa maritime security ug napugos sa pag-atras. Apan giinsistir sa U.S. Central Command nga walay bisan unsang Navy ship ang naigo sa insidente.
Samtang gipahibalo sa U.S. military ang bag-ong inisyatiba nga giendorso ni U.S. President Donald Trump, diin posible nga gamiton ang naval ug air assets aron mogiya sa mga commercial vessels sa Strait of Hormuz, diin daghang barko ang naipit tungod sa tensyon.
Sumala sa taho, pipila ka barko ang giatake o gipugngan sa Iran tungod kay wala kini pagtugot.
Gitambagan usab ang mga barko nga moagi sa katubigan sa Oman taliwala sa gitukod nga “enhanced security area.”
Gitawag sa Iran ang lakang sa U.S. nga paglapas sa kasamtangang ceasefire, samtang gibutyag sa Estados Unidos nga kabahin kini sa “Project Freedom” nga nagtumong sa pagtabang sa mga na-stranded nga seafarers nga nag-atubang sa kakulang sa pagkaon ug tubig taliwala sa gubat.
