BUTUAN CITY – Nanawagan ang Department of Health (DOH) sa publiko nga mosunod sa mga protective measures batok sa ashfall samtang nagpadayon ang volcanic activity sa Mayon Volcano nga naghatag og risgo sa panglawas sa mga komunidad duol niini.
Sa ilang advisory, gipasiugda sa DOH ang kamahinungdanon sa pagsul-ob og sakto nga proteksyon, paglikay sa delikadong lugar, ug pagminus sa exposure sa volcanic ash nga maghatag sa iritasyon ug problema sa pagginhawa.
Sigon sa ahensiya nga ang mask makatabang sa pagsala sa gagmay nga particles nga mahimong makairita sa ilong, tutunlan, ug baga. Giawhag usab sa DOH ang publiko nga likayan ang pagduol sa mga delikadong lugar sa bulkan.
Gitambagan usab ang mga residente nga sirad-an ang ilang balay aron dili makasulod ang abo og gamiton ang basa nga panapton aron tabonan ang mga siwang.”
Aron maminusan ang kahasol tungod sa ash exposure, gidasig sa DOH ang pag-inom og daghang tubig makatabang kini sa pagpakunhod sa iritasyon sa tutunlan, baba, ug baga.
Sa katapusan, gipahinumdoman sa ahensya ang publiko nga mangayo dayon og tabang kung gikinahanglan, ug anaa gihapon ang emergency hotlines lakip na ang national emergency number nga 911.
