BUTUAN CITY – Gikumpirma sa International Criminal Court (ICC) nga kinahanglang personal nga moatubang sa pagtaral si kanhe Pangulong Rodrigo Duterte para sa kasong crimes against humanity human gikumpirma sa Pre-Trial Chamber I ang mga charges batuk kaniya.
Sumala sa ICC, tataw sa Rome Statute nga dapat anaa ang akusado sa panahon sa trial.
Mahinumdumang mitambong ang kanhe pangulo sa Pre-Trial Chamber niadtong Marso 2025, apan wala na siya mitambong sa mga musunod nga pagdungog lakip na ang confirmation of charges proceedings niadtong Pebrero.
Sa ilalom sa mga patakaran sa ICC, mamahimong temporaryong pahawaon ang akusado sa courtroom kung ugaling makabalda siya sa pagtaral apan hatagan pa gihapon siya og higayong sundan ang proceedings pinaagi sa communication technology ug makig-alayon sa iyang abogado.
Apan gibutyag sa korte nga ang susamang lakang gamiton lang sa “exceptional circumstances.”
Si Duterte anaa sa kustodiya sa ICC sukad pa niadtong Marso 2025 may kalabutan sa kasong mahitungod sa dugoon matud pang ‘war on drugs’ sa iyang administrasyon, lakip na usab ang mga alegasyong pagpatay niadtong siya alkalde pa sa Davao City.
Una nang gihimakak ni Duterte ang akusasyon diin gibutyag niini nga siya ang nagpatuman sa mga polisiya batuk sa iligal nga droga apan dili matud pa siya direktang responsable sa matag namatay sa operasyon sa mga awtoridad.
Sigon sa datos sa kapulisan, kapin 6-mil ang namatay sa operasyon sa iyang administrasyon.
Bisan paman niini laumang magmugna ang ICC Presidency og Trial Chamber nga mohawid sa kaso og magtakda ang mga hukom sa petsa sa pagtaral og maglalatag sa mga procedural rules, lakip na ang paghawid sa ebidensya ug uban pang preliminary issues.
Gibutyag usab sa ICC nga dili awtomatikong mamahimong iapela ang desisyon sa confirmation of charges.
Mamahimo usab nga mohangyu og interim release si Duterte apan anaa sa desisyon pa gihapon kini sa mga ICC judges.
