BUTUAN CITY – Usa ka 63-anyos nga lalaki sa Norway ang gikonsiderang halos na-ayo o “cured” gikan sa HIV human mipailalom sa stem cell transplant gikan sa iyang kapatid, sumala sa mga doktor.
Sigon sa mga tigduki-duki, ang igsoon sa pasyente dunay talagsaong genetic mutation nga kayang pug-ngan ang virus nga makasulod sa mga cells sa lawas.
Ang pasyente, nga gitawag nga “Oslo patient,” dunay HIV sukad pa niadtong 2006 ug na-diagnose usab sa grabeng blood cancer nga myelodysplastic syndrome niadtong 2017.
Tungod niini, kinahanglan niya og stem cell transplant aron tambalan ang cancer. Sa pagpangeta og donor, napili ang iyang magulang nga igsoon.
Dakong kakurat sa mga doktor sa dihang nadiskubrihan sa mismong adlaw sa transplant niadtong 2020 nga ang igsoon diay dunay CCR5 gene mutation nga magpugong sa HIV.
Sumala ni Dr. Anders Eivind Myhre sa Oslo University Hospital nga paglabay sa duha ka tuig gihunong sa pasyente ang pag-inom og anti-retroviral drugs. Wala nay nakitang lama sa HIV sa iyang dugo, tina-e og bone marrow.
Dugang pa sa mga doktor, ang pasyente mas himsog na karun ang pamati.
Bisan paman niini gibutyag sa mga eksperto nga ang susamang procedure delikado ug gigamit lang sa mga pasyenteng dunay HIV ug grabeng blood cancer, rasong dili kini praktikal para sa kadaghanang dunay HIV.
Nagtoo ang mga tigduki-duki nga makatabang ang mga susamang kaso aron mas masabtan ang HIV ug makapangeta og posibleng tambal para sa mas daghang pasyente sa umaabot nga panahon.
