BUTUAN CITY – Nahimong sentro sa atensiyon ang pagtambong ni Ramil Madriaga sa impeachment hearing sa House Committee on Justice karung adlawa.
Gisugdan kini ni Madriaga, ang nagpailang bagman ni Vice President Sara Duterte, pinaagi sa pagbasa sa iyang affidavit og human niini, nakasentro na ang mga clarificatory questions sa maong affidavit hangtud nga gibuhian kini pasado alas 3:00 sa hapon tungod kay hangtud lang alas 4:00 sa hapon gihatag sa korte nga patambongon kini sa pagdungog.
Lakip sa nakakuha og atensiyon ang pagtestigo ni Ramil Madriaga nga gisultian matud pa siya sa pamilyang Duterte nga motabang sa pagpapagawas sa mga nakumpiskang kargamento nga sa kaulahian nadiskobre nga adunay bilyon-bilyong kantidad sa shabu.
Sumala pa niini nga gimanduan siya ni Duterte niadtong 2017 hangtod 2018 aron motabang kang Manases Carpio sa usa ka buluhaton nga wala pa niya masabti niadtong panahona.
Sa ulahi, nahibal-an niya nga kini may kalabutan sa pagpapagawas sa mga kumpiskadong “construction equipment” gikan sa Bureau of Customs.
Sigon ni Madriaga nga nagkita sila ni Carpio sa Bonifacio Global City, diin gihangyo siya nga motabang sa pagproseso sa pagpapagawas sa maong kagamitan nga na-flag sa ahensya.
Apan sa dihang iyang personal nga giadto ang Bureau of Customs paglabay sa pila ka adlaw, iyang nadiskobrehan nga ang giingong “construction equipment” mao diay ang mga magnetic lifters nga giingong adunay daghang shabu.
Midugang kini nga gisultihan siya sa usa ka babayeng abogado nga lisod ipagawas ang maong kargamento tungod kay kini giisip nga “hot item.”
Human niini, gi-report ni Madriaga ang iyang nadiskobrehan kang Carpio ug nagkita sila pag-usab, ug mao na kini ang katapusang higayon nga naapil siya sa maong isyu.
Bisan pa man niini, nahibal-an niya sa ulahi nga nawala ang sulod sa mga magnetic lifters—gibanabana nga dili moubos sa 500 kilo sa shabu nga nagkantidad og P4.3 bilyon.
Giklaro usab ni Madriaga nga dili tinuod ang pamahayag ni Sara Duterte nga wala sila’y koneksyon. Isip pamatuod, iyang gipresentar sa justice panel ang mga ebidensya sama sa mga litrato, screenshot sa video call, ug mga email.
Sa iyang testimonya, giangkon usab ni Madriaga nga kaniadto usa siya ka matinud-anong supporter sa pamilyang Duterte ug nahimong kabahin sa grupong Initiative for Social Justice, Innovation, and Progress Pilipinas nga misuporta sa ilang kampanya.
Sa iyang pagsaysay, nahimong emosyonal si Madriaga ug nakahilak samtang iyang gihulagway ang iyang mga kasinatian ug ang mga giingong sugo nga iyang gisunod kaniadto.
Sa pagkakaron, wala pa’y opisyal nga pahayag gikan sa mga gipangalanang personalidad bahin sa maong mga alegasyon.
