BUTUAN CITY – Nanawagan si Senador Sherwin Gatchalian og dinaliang pagpalig-on sa mga mental health programs human sa makapabalaka nga pagsaka sa kaso sa suicide sa Metro Manila karong tuiga.
Base sa report sa National Capital Region Police Office (NCRPO), sobra sa doble ang pagsaka sa kaso sa suicide sa unang tulo ka bulan sa 2026. Gikan Enero 1 hangtod Marso 23, niabot sa 111 ang natalang kaso,hapit tulo ka pilo kumpara sa 38 ka kaso sa parehas nga panahon sa 2025.
Sumala sa senador, mas gikinahanglan karon ang mental health support tungod sa nagpadayon nga mga krisis nga direktang nakaapekto sa adlaw-adlaw nga kinabuhi sa mga Pilipino.
Gihisgutan usab ni Gatchalian nga adunay gitagana nga 742.6 milyones pesos ilalom sa 2026 national budget alang sa implementasyon sa Mental Health Program subay sa Republic Act No. 11036.
Bisan paman niini, gibutyag sa senador nga dili igo ang pondo kung dili mapaspasan ug mapalapdan ang implementasyon sa mga serbisyo, labi na sa mga komunidad nga adunay taas nga risgo.
Sa padayon nga pagsaka sa gidaghanon sa mga kaso, gipasiugda sa magbabalaod ang panginahanglan sa mas koordinadong aksyon gikan sa gobyerno ug lain-laing sektor aron malikayan pa ang dugang nga trahedya.
Nanawagan usab kini og mas agresibo nga kampanya sa awareness, mas sayon nga access sa counseling, ug community-based interventions aron matubag ang nagkagrabe nga mental health crisis sa nasud.
