BUTUAN CITY- Gipatin-aw ni pediatric hematologist Dr. Edwin Rodriguez, nga mas dali mataptan og sakit sa dugo ang mga bata tungod kay dili pa hingpit ang ilang immune system ug giila sila nga vulnerable population, samtang dako usab ang papel sa nutrisyon sa inahan ug bata sa paglikay sa mga kondisyon sama sa anemia, leukemia, ug bleeding disorders.
Sumala kaniya, ang kakulangan sa iron, folic acid, ug bitamina B12 mahimong hinungdan sa anemia nga kasagarang makita sa mga batang Pilipino, samtang ang leukemia maoy pinakakomong kanser sa mga bata nga mahimong paspas o hinay ang pag-uswag depende sa klase.
Gihisgutan usab ang hemophilia ug uban pang namananang sakit nga kasagaran makita sa lalaki, diin lisod mapugngan ang pagdugo.
Gidasig ni Rodriguez ang padayon nga pagpasuso ug paghatag og iron-rich nga pagkaon sugod sa ika-6 ka bulan, samtang gipasiugda nga ang sayong pagpa-check up ug blood tests sama sa CBC makatabang sa dali nga pag-diagnose ug paglikay sa komplikasyon sa mga sakit sa dugo.
