BUTUAN CITY – Hugtanong gipanghimakak ni House Justice Committee Chairperson ug Batangas 2nd District Representative Gerville Jinky Luistro ang alegasyon nga adunay mga magbabalaud nga gihanyagan og suhol bugti sa ilang boto alang sa impeachment batok kang Bise Presidente Sara Duterte.
Sumala ni Luistro, wala siya nakadawat og bisan unsang paningkamot gikan sa liderato sa Kamara aron impluwensyahan ang paagi sa pagboto sa komite.
Ang isyu sa suhulay unang gibulgar ni Navotas Rep. Toby Tiangco, apan dali usab kining gipanghimakak sa ubang miyembro sa komite sama ni Manila Rep. Joel Chua.
Sigon ni Luistro, bisan pa nga ang impeachment usa ka natural nga political process, nakabase gihapon kini sa ebidensya ug tulubagon sa publiko.
Sa pagkakaron, gitakda na sa Kamara sa Marso 25 ang unang pagdungog bahin sa mga reklamong impeachment batok kang Duterte, nga nagpunting sa gika-ingong dili hustong paggamit sa confidential funds dihang siya pa ang kalihim sa Department of Education kon DepEd.
Ang maong isyu nagdala og dakong pagtagad sa publiko, ilabina kay sensitibo gihapon ang political climate sa nasud.
Bisan pa man sa mga alegasyon, gisiguro ni Luistro nga magpabilin nga patas ug transparent ang proseso sa komite.
