BUTUAN CITY – Nakatala og bag-ong record nga P60.10 kada-US dollar ang balor sa piso sa pagsira sa trading kagahapong adlawa, kansa mao na ang pinakahuyang nga level sa kasaysayan. Natala ang intraday low nga P60.4 ug average nga P60.161 human nagsugod sa P59.9 ang opening rate.
Sigon sa mga analyst, dala kini sa padayong pagtaas sa presyo sa langis sa pangkalibutanong merkado ug sa tensyon sa Middle East.
Mikusog usab ang dolyar tungod sa pagbalhin sa mga investors sa safe-haven assets.
Sigon sa Bangko Sentral ng Pilipinas (BSP), padayon nilang gibantayan ang sitwasyon ug andam silang mu-intervene kung gikinahanglan.
Pahimangno sa ekonomistang si Prof. Emmanuel Leyco, ang hinay nga piso maoy mag-aghat sa mas taas nga presyo sa mga gi-angkat nga produkto, ilabina sa petrolyo.
Tungod niini, gila-umang mutaas pa ang inflation kung magpadayon ang pagkunhod sa balor sa piso kontra dolyar.
