BUTUAN CITY – Human ang kapin usa ka semana nga pagkabuka sa mata ug paglihok sa tudlo human nag-collapse atol sa iyang training dinhi sa Butuan City, hingpit nang nakabsan sa kinabuhi karong hapon lang ang flyweight champion sa Philippine Boxing Federation kon PBF nga si Jordan ‘Tuklaw’ Atlao ubos sa timbang nga 112-libras.
Base sa post sa iyang manager sa Don Punch Promotions nga si Dondon Llagas, bug-at sa iyang kabubut-on ang pagkawala sa batan-ong boksingerong gikonsidera pa niyang anak.
Madumdumang dihang eksklusibong na-interview ning sibyahan, gikumpirma ni Llagas nga pagkagabii gilayon niadtong Marso 2 human natumba si Atlao pasado alas-dos sa hapon, gidala gilayon nila kini sa ACE Medical Center ning siyudad kondiin na-operahan siya pasado alas-9:30 sa gabii nga nahuman pasado alas-kwatro usab sa kaadlawon sa Marso 3.
Mihimo matud pa og duha ka hugna sa sparring sessions si Tuklaw niadtong adlawa isip preparasyon sa iyang 8-round nga away karong Mayo 29 nga himuon sa Korakuen Hall sa Japan batuk kang Japanese boxer Ryota Yamauchi.
Nasayrang nakasinati kini og severe traumatic brain injury nga mugna matud pa sa pag-inom og daghang tubig samtang kamulo pa og pasingot kondiin wala na makarekober.
