BUTUAN CITY – Gipamugos usab sa kampo ni kanhi Pangulong Rodrigo Duterte nga biktima lamang si kanhi Pangulong Rodrigo Duterte sa sensationalism gikan sa media sa Pilipinas kondiin gibatikos ni defense lead counsel Nicholas Kaufman, ang paagi sa pagbalita sa mga media entities sa nasud.
Sigon sa abogado, nag-antos ang iyang kliyente tungod sa na-andan matud pa sa Philippine media nga mitutok lang sa mga salacious elements o sa mga kontrobersyal ug makakurat nga parte sa sa pamahayag sa mga indibidwal.
Gipasabot ni Kaufman, nga ang ingon niini nga klase sa pagbalita, wala nagpakita sa kinatibuk-ang konteksto sa mga pamahayag sa kanhi pangulo nga mao usa’y gigamit karon sa iyang mga ka-atbang.
Samtang gipresenta usab sa kampo ni kanhi Pangulong Rodrigo Duterte ang usa ka chart nga nagpakita sa datos sa mga gihimong anti-drug operation sa Pilipinas gikan tuig 2016 hangtod 2019.
Base sa maong chart, mas daghan ang gidakop nga mga indibidwal kumpara sa gidaghanon sa mga namatay atol sa war on drugs.
Ang kampo ni Duterte nagpasabot nga ang datos nagpakita nga mas gi-una sa mga otoridad ang pagdakop kaysa pagpatay, ug kini usa ka ebidensya nga nagdepensa sa administrasyon batok sa mga pasangil nga extrajudicial killings.
