BUTUAN CITY – Subay sa paghandum sa ika-40 nga anibersaryo sa Epifanio de los Santos Avenue People Power Revolution, gipahinumdoman sa Department of Labor and Employment (DOLE) ang mga employers nga ipatuman ang “no work, no pay” policy ning adlawa.
Kini human gideklara ni Pangulong Ferdinand Marcos Jr. ang Pebrero 25 isip “special working day” kondiin gihandom ning adlawa ang pagpalagpot sa katawhan sa iyang amahang diktador nga si Ferdinand Edralin Marcos Sr.
Tungod niini, gibutyag sa DOLE, nga isipon kini nga ordinaryong adlaw sa trabaho alang sa pagkwenta sa sweldo ug mga benepisyo nga may kalabutan sa sweldo.
Gipasabot sa DOLE nga ang “no work, no pay” policy ipatuman kung ang empleyado dili mutrabaho ning adlawa, gawas kung adunay collective bargaining agreement o polisiya sa kompanya nga naghatag og bayad bisan dili mutrabaho.
Ang empleyado nga mu-report sa trabaho niining special working day adunay katungod sa 100% sa iyang adlaw nga sweldo alang sa unang walo ka oras sa trabaho samtang ang empleyado nga mulapas og walo ka oras sa trabaho kinahanglan hatagan og dugang nga 25% sa iyang hourly rate.
