BUTUAN CITY – Andam na ang Diocese of Butuan sa himuong I-Tag White Movement Part 2 karong Pebrero 25 atol sa paghandom sa ika-40 nga anibersaryo sa EDSA People Power revolution.
Sa eksklusibong pakighinabi sa Bombo Radyo Butuan, gipadayag ni Diocese of Butuan spokesperson Fr Glenn Adam Abamonga nga sugdan nila ang maong kalihukan nga himuon sa Guingona Park gikan sa alas-tres sa hapon ngadto na sa alas-otso sa gabii kansa kabahin usab sa ikatulo nga Trillion Peso March nga himuon sa may EDSA Shrine.
Dinhi sa dakbayan sa Butuan, himuon ang panagtapok sa katawhan aron saksihan ang konsyerto, pagpamulong sa mga sectoral leaders, mga presentasyon ingon man misa isip bendisyon sa 40 ka tuig na nga bloodless revolution.
Gipasabot ni Fr Abamonga nga importante ang maong kalihukan tungod kay pangaliya kini alang sa Kahitas-an aron giyahan ang katawhan ug mapanubag ang mga opisyal sa gobyerno gikan sa lokal ngadto na sa nasudnong lebel sa kurapsyon nga nahitabo karon sa nasud.
Kung wala matud pa ang panalangin, dili mulahutay ang pakigbisog sa tanan.
