BUTUAN CITY – Mag-atubang og kasong paglapas sa RA 11930 kon mas nailang Anti Online Sexual Abuse and Exploitation of Children and Anti Child Sexual Abuse and Exploitation Material Act, ang 22-anyos nga lalaking nasikop sa mga sakop sa Regional Anti-Cybercrime Unit kon RACU-13 didto sa lungsod sa Jabonga, Agusan del Norte.
Kini human natumbok nga siya ang bugtong tawo nga nagkupot sa cellphone sa 17-anyos nga dalagang grade 11 student dihang gipa-ayo kini kaniya sa 15-anyos nga hinigugma usab sa biktima.
Nasayrang paspas nga mikaylap ang ilang mga videos ug hulagway dili lang diha sa social media, apan lakip na sa ilang barangay ug eskwelahan hangtud na sa tibuok Caraga Region ug ubang dapit sa nasud.
Midangop na sila sa mga otoridad tungod sa kahadlok ug kaulaw rason nga gihimo ang operasyon ug didto nakuha gikan sa cellphone sa suspetsad ang mga kopya sa maong sex videos ug duna pay mga mensahe nga iya kining gitanyag ni bisan si kinsang gustong makakuha og kopya sa mga niini.
