BUTUAN CITY – Mi-apela si Kalayaan Vice Mayor Maurice Philip Albayda sa mga Pilipino nga dili magpadala sa mga sayop nga naratibo nga pabor China o kaha sa mga indibidwal nga buta sa mga gisuportahang pulitiko.
Kini ang reaksyon sa besi mayor sa pamahayag ni Senador Rodante Marcoleta atol sa pagdungog sa Commission on Appointments sa Senado niadtong Pebrero 4, nga mas maayo nga isurender na lamang ang Kalayaan Island Group (KIG) tungod kay dili matud pa kini sakop sa exclusive economic zone (EEZ) sa Pilipinas.
Sa eksklusibong pakighinabi sa Bombo Radyo Philippines, nanawagan ang besi mayor og hini-usa lamang nga naratibo tungod kay angayan lang matud pang magkahi-usa ang mga Pilipino sa hisgutanan sa Kalayaan Island Group ug sa West Philippine Sea nga maoy pinakadakong tuburan sa natural gas ingon man pinaka-importanteng tuburan sa kuha-unong isda sa Pilipinas.
Giklaro usab ni Albayda nga wala’y igong rason aron isurender ang Kalayaan Island Group ug ang West Philippine Sea ilabina nga daghan na og gisakripisyo ang katawhan aron mapreserba ang maong teritoryo sa Pilipinas.
Dugang sa opisyal, duna’y kapin sa 400 ka mga households ang nagpuyo sa Pag-asa Island kansa mao ang bugtong ukupadong isla sa kinatibuk-ang Kalayaan Island Group nga duna’y kapin sa 100 ka mga estudyante sa Integrated School.
