BUTUAN CITY – Opisyal nang muhunong sa ilang operasyon karong Marso 30, ang Philtranco Service Enterprises, Inc., ang pinaka-karaan nga bus company sa Pilipinas, human sa kapin usa ka siglo sa serbisyo sa publiko sa natad sa transportasyon.
Ang pagsira nagpasabot og dakong epekto sa mga empleyado nga dugay nang nagserbisyo sa kompanya ilabina nga dili lang kini usa ka business closure, kundili usa ka cultural ug historical moment nga nagtimaan sa katapusan sa usa sa pinakamatigulang ug iconic nga transport brands sa Pilipinas.
Sigon ni President ug CEO Michael Sabban, ang nagtukmod kanila sa maong desisyon mao ang grabeng alkansi bisan pa sa paningkamot nga mapadayon ang negosyo tungod kay dili na makaya sa kompanya ang payroll ug operasyon.
Madumdumang natukod kini niadtong tuig 1914 isip ALATCO kon Albert Louis Ammen Transportation Company) kondiin sulod sa 112 ka mga tuig kining nagserbisyo sa mga ruta gikan sa Manila padulong sa Luzon, Visayas, ug Mindanao.
Nahimo usab nga simbolo ang maong transport company sa lig-on nga “Republic Nautical Highway” ug usa sa mga haligi sa modernong transport industry sa nasud tungod kay nakalahutay kini sa mga World Wars, economic shifts, ug daghang kausaban sa public travel.
